從學民思潮走到香港眾志，再到《港區國安法》實施前夕，香港眾志宣佈解散，8年間，那些年的中學生已長成大人，參與並見證着香港的風風雨雨。6.21包圍警總案今判決，黃之鋒與林朗彥已非首次入獄，而周庭則面臨首次監禁。三人的多年戰友﹑從反國民教育絕食一起走到今天的黃莉莉坦言，最擔心的是周庭，「好多時佢嘅軟弱都唔會表露喺人前，會令人擔心同埋在意啲」。

記者 李雨夢

黃莉莉於2012年反國教運動加入「學民思潮」，並參與絕食行動。那年18歲的她，認識了黃之鋒、林朗彥、周庭三人。後來於2014年退出學民，又在年輕政黨「香港眾志」成立之後，幾經猶豫，終於決定加入，擔任組織幹事。只是沒有料到，「港區國安法」的來臨，眾志終要宣佈解散，眾人各散東西。

經歷了整場反送中運動後，對於6.21包圍警總案終要判決，黃莉莉直言感受已沒有2017年的「13+3」判監來得震撼，「當時半年以上嘅刑期已經覺得係好重嘅刑罰，但依家出面更多手足係以年計去監禁，呢次佢哋坐就覺得應該唔會好耐，所以情緒上無之前咁激動」。

然而周庭或面臨首次監禁，仍然讓黃莉莉感到很難受，「好多時候，佢嘅軟弱係唔會好輕易去向我哋表達，要佢一個人去承受呢件事，而佢係從來都未試過，會令我比較擔心同埋在意」。黃莉莉又指，或者大家都是女生，更設身處地嘗試理解周庭的困境，「不過我哋都好少傾坐監嘅嘢，有默契咁樣佢唔會特別講，我都唔會特別過問」。

黃莉莉判刑前有定期與周庭見面，「佢可能會間中講一、兩句（案件），但未必好認真咁講，可能佢有佢嘅軟弱同憂慮，但都未必好想好認真咁同人講，只係會講笑咁講一、兩句，例如話︰可能都入去㗎啦、唔知出唔出到嚟過生日呢啲」。

然而，三個戰友被送進監獄，仍會令黃莉莉感觸，「佢哋真係用咗人生之後嘅路去押上，特別係Ivan（林朗彥）同Gif（黃之鋒花名），之前有案底，佢哋係押上咗自己嘅人生，原來之前定罪過嘅嘢，會令到依家嘅刑罰唔係預期之內，當個極權打壓得越嚟越勁時，要承受好大嘅後果」。

自從「13+3」的刑期覆核開始，黃莉莉常常會有種無力感，「好似越做越多嘢，但打壓就越勁，我哋要承受嘅嘢就越多，我哋係指出面嘅所有手足，好似當個社會越努力、越多人覺醒、越多人願意出嚟時，要承擔嘅痛苦同後果就越嚟越多」。

與三人相知相交8載，從十多歲到二十多歲，黃莉莉也見證三人的成長與轉變。回想8年前的反國教，還是中學生的他們，黃莉莉笑言當時對周庭的印象並不深刻，「睇返Netflix個紀錄片，都會發現，乜原來周庭以前係咁嘅樣」。多年之後，黃莉莉眼中的周庭更懂得與人相處，「同埋更願意去同你講笑，將你取笑佢嘅嘢，諗吓點樣去講，點樣去將個取笑變成唔尷尬嘅嘢，喺呢一、兩年嘅相處，佢畀我感覺係更加搵到自己，亦都係好大嘅變化」。

對於周庭於《國安法》生效前宣佈退出香港眾志，亦表明無法參與未來的國際戰線，如此退後一步的人，依然遭到政權窮追猛打並以《國安法》拘捕，黃莉莉直言感到「好慘，去到呢啲位，佢都唔能夠話係舒服啲，只係唔想影響到屋企人，佢唔係話以後都唔關心呢個社會，或者參與社會運動，佢依然係用緊佢嘅方式去關心呢個社會，但只係希望唔好觸碰到國安法嘅嘢。好慘個位係，你向前唔知可以承受到幾多，但你退後都係無得退囉」。

如果周庭是個轉變很大的人，那黃之鋒在黃莉莉眼中，卻是多年不變，「佢成日做好多嘢都會令人覺得，呢條友咁多年都無變，佢以前坐監係同喺出面無乜分別，一有人去探佢，佢就會準備好working list畀唔同嘅人，會喺監獄入面諗自己仲可以做啲咩，會覺得呢個人好黐線，亦都會令人覺得佢好似經歷任何事情都無變化咁」。

不過，黃莉莉指黃之鋒在與人相處方面則改變不少，「以前佢未必會咁理會人感受，未必會咁願意去take care你嘅感受，或者去接觸同人或感情有關嘅嘢，我覺得佢依家係願意咗」。她又分享黃之鋒的「暖男」事蹟，「記得之前有日去餐廳拍周庭嘅片，黃之鋒都嚟咗，嗰日我係M痛得好犀利，佢知道之後，第二日畀咗一樽紓緩M痛嘅嘢飲我，原來佢都有好sweet同埋好暖男嘅一面」。

三人當中，黃莉莉對林朗彥最熟悉。她指林過去是很行動型及思考型的人，「可能都同呢一、兩年個社會氣氛有關，佢唔再只係諗點樣去行動、點樣去拆解社會嘅結構，而係多咗一分沉得住氣」。例如在戰線上的一些轉變，「我哋依家多咗media work嘅嘢，我會覺得會唔會可以做啲落地啲嘅嘢，但佢就會覺得YouTube都係好重要嘅位，佢會話畀你聽依家咁做，係想準備緊啲咩，就算依家呢個時間未必做到啲行動或組織，但就要謹守自己做緊嘅嘢囉」。在黃莉莉眼中，即使現實正壓迫人在一步步退後，但林朗彥依然沒有放棄，「仲係好樂觀、好有力量」。

看着一起成長的戰友面臨被判監的下場，黃莉莉坦言，情緒難免有所起伏，然而她作為在外面的人仍要把日子及生活整理好，才能為已被監禁的人做得更多。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！