【食完再減】健身狂人都有放鬆嘅一日 C朗：我會同囝囝一齊食薄餅
蘋果日報 2020/06/15 00:01
祖雲達斯基斯坦奴朗拿度
雖然需要控制飲食，但C朗表示自己不時會與兒子一起進食薄餅。
年屆35歲嘅祖雲達斯球星基斯坦奴朗拿度（C朗），雖然最近幾年狀態開始有下滑跡象，但仍然係隊內不可或缺嘅王牌球員。每當提起C朗，各位球迷都一定會諗起佢嘅身體素質同埋佢嘅自律性，不過呢位葡萄牙球星近日受訪時就話，原來自己都經常會同囝囝一齊食薄餅。
為咗成為世界上最佳嘅足球員，C朗一直非常注重自己嘅飲食習慣，18年嘅時候C朗仲話自己身體質素得23歲。就連佢嘅前曼聯隊友艾夫拿就曾經講過，去C朗屋企食飯得雞胸肉同埋沙律，就連果汁都冇。不過近日C朗接受網絡紅人Chris MD訪問時就話，自己間唔中都會偷雞放鬆吓：「關鍵係點去照顧好自己身體，再去訓練，令身體恢復健康，同埋要控制飲食。不過有時候都會同囝囝食薄餅，唔係嘅話生活實在太無聊喇！」
不過後生嘅C朗其實並唔係一身肌肉，仲因為俾人話太瘦而需要去健身：「本來我好瘦，完全冇肌肉。所以我喺11歲嘅時候做咗決定，我知道自己有潛質，但係我要比每個人更加努力。我夜晚會偷偷哋走出去訓練，開始我就越嚟越大隻，越嚟越快。」