前天（2日）係影后惠英紅55歲生日，生日當日紅姐仍身在台北，為新戲《神秘家族》拍攝煞科戲，雖然生日要喺工作中度過，但意外驚喜陸續有來，令佢度過感動又窩心的難忘生辰。

早前惠英紅拍攝《神秘家族》時，喺片場發生意外，被鐵罐割傷右眼角位置縫咗九針，不過紅姐復原情況比想像中好得多，紅姐亦感謝大家慰問：「已經好番晒，回復靚女一名！」

當日紅姐晨早到片場開工，而老闆楊受成神秘越洋送咗大束佢最鍾意嘅鬱金香、玫瑰同芍藥，向佢賀壽，惠英紅開心表示：「多謝楊老闆，太有心思喇，完全估唔到楊老闆會送花到台北的片場，好浪漫呀！最感動係，楊老闆所送的都是我最鍾意的鬱金香、玫瑰同芍藥，全部齊晒。」

之後，紅姐再收到英皇電影越洋送上嘅巨型生日旦糕，而劇組嘅燈光組、道具組、服裝組等，都各自準備咗生日蛋糕畀紅姐，結果紅姐生日當天，總共收咗五個蛋糕，人緣超好，而全場工作人員及演員林依晨、姜武，韓國導演朴裕煥等，一齊為佢唱生日歌，相當熱鬧。

談及生日願望，紅姐表示：「希望我的家人、朋友、粉絲，全部所有人都身體健康，開心快樂！」切完蛋糕後，紅姐突向在場人士塗上忌廉，令林依晨、姜武等殺個措手不及。