仲考慮緊係咪參選特首嘅前政務司司長唐唐，民望被備選嘅對手梁振英大幅拋離，加上婚外情呢啲課外活動醜聞困擾，形勢都幾不利。唐唐陣營都要諗計挽救劣勢，趁住噚日六條一光棍節，佢終於出手喇，原來噚日係唐唐父母唐翔千同尤淑圻結婚60周年紀念正日，全家人噚晚喺中環上海總會擺咗五席慶祝，實行打親子牌造勢。
唐唐噚晚大約七點，一個人條條揈抵達上海總會，當佢見到有傳媒在場守候，好似好驚奇咁問大家，「點解你哋喺度嘅？」佢話噚日係佢父母結婚60周年紀念，一家大細同兩老食飯慶祝。至於送啲乜嘢禮物俾父母，佢就話唔透露喇。其後唐翔千夫婦抵達，唐媽媽見到傳媒喺度，兩母子可能心靈相通，第一個反應竟然係，「係咪唐太叫你哋嚟？」有行家問唐翔千支唔支持個仔選特首，佢就冇作答，唔似太太咁高調支持個仔。

最少飲咗70萬紅酒

唐唐一家同上海幫關係密切，父母慶祝結婚紀念都係食上海菜。唐唐同八方講噚晚筵開五席，成個家族大大細細都喺晒度，最年長嘅係佢叔公，即係佢阿爺個細佬，最細嗰個呢，按輩份排都要叫聲唐唐做阿公，難得五代同堂，佢話對佢兩位年過八十嘅父母嚟講，已經係最好嘅禮物。唐唐噚日都非常識做，應在場傳媒要求，拖埋太太同父母俾大家影番張合照交差。唐唐話以前結婚75周年先叫鑽婚，家60周年都算鑽婚，想好似父母咁慶祝鑽婚，唐唐真係要修心養性，唔好再有咁多感情缺失。
唐唐一向鍾意飲紅酒，據知噚晚佢帶咗三支價值各十幾萬嘅紅酒到場，後來唔夠飲，嗱嗱聲加碼拖多兩支到場，呢餐結婚紀念家庭飯局，淨係飲紅酒都最少飲咗70萬。
言歸正傳，考慮咗咁耐，究竟唐唐係咪去馬選特首，八方直接問唐唐，佢又係笑笑口咁話，「我喺適當時候會有公佈。」吓！又係呢兩句行貨回應？唔好咁拖拖拉拉啦，大丈夫係選咪選囉，到時你唔選就真係奇聞喇。

mailto:[email protected]