電台講股阿姐靚女L，相貌甜美，正一人靚聲甜。前日行街，做緊windowshopping之際，忽然有一年輕女士，樣子似二十歲啱啱出頭，行埋佢旁邊細細聲問：「L小姐，九三九重買唔買得過？」九三九就係中國建設銀行，近日升到飛起，破咗三蚊關口之後，一個星期內就升到三個七，技術上係嚴重超買，成為散戶蜜糖，賺到笑。
靚女L素來穩陣，唔會亂咁叫人高追某隻股票，只好話：「升得太快太多，可能重有得升嘅，不過風險愈來愈大，高追要好小心，日日昅到實至得。」少女多謝而去。

靚女L向左丁山講呢件事，令左丁山想起資深投資者人人都知道嘅一件經典故事，就係石油大王洛克菲勒有一次喺紐約街頭幫襯擦鞋仔，擦鞋仔一邊同大富豪擦鞋，一邊問洛克菲勒關於股票之事，重話聽到一啲股票會升噃。洛克菲勒返到辦公室之後，即刻沽股票，屬下問點解，洛克菲勒話：「連街邊擦鞋仔都講股票，即係炒過龍，股市到頂之兆。」事後證明，洛克菲勒沽得快，好世界，股市後來真係大跌。
二十零歲女在街頭向靚女L問九三九，可見「建行」之名，深入民心，唔識炒股之人，都加入買家行列，可能係國企指數短期到頂先兆，高追九三九之類就無謂咯。記得人人都唱油價七十元一桶之時，油價就反覆下落，跌破六十美元一桶。金價升到五百七十美元一安士之時，人人睇六百美元，金價就掉頭回落，跌破五百五十美元。呢啲故事，屢試不爽，如果本身冇熱門國企股在手，就冇謂追咯，追得多，未必好，寧願畀啲耐心、耐性，一於等到高位下滑，調整完畢後先至入市。