後日42歲生日嘅張智霖（Chilam），今日同陳法拉及馬國明等《衝上雲霄II》演員，去到將軍澳宣傳，一班人喺台上面大玩魔術遊戲，令現場氣氛非常熱鬧。

去到尾聲，一班演員為Chilam提早慶生，送上一個巨型蛋糕，法拉就好識做咁獻上香吻賀壽星。

問Chilam有咩生日願望?佢笑言:「今年對我係大豐收，加上呢套劇嘅成績又好好，希望一路都咁受歡迎，個人嚟講冇乜生日願望，囝囝健康快樂已經係最好嘅禮物。」咁會唔會想老婆袁詠儀有驚喜俾佢？佢就笑住話：「最好唔好喇，我個人鍾意有安排，如果驚喜唔知有乜嘢反應好。」