74萬蚊，對賭王何鴻燊嚟講，絕對係濕濕碎，真係行過唔覺意跌咗都唔知，就算知都未必執番嗰隻。眼見對手金沙賭場就係因為區區74萬蚊搞到滿城風雨，唔肯派錢畀未夠秤但又贏咗錢嘅16歲少女彤彤，賭王似乎都覺得金沙好失禮，噚日同八方講起呢單嘢時好勞氣。賭王話願賭要服輸，人哋真係喺你賭場贏咗錢嘛，梗係要賠啦，唔係點開賭？
彤彤贏錢後，金沙搞咗幾日先肯派彩，賭王話若然彤彤喺葡京贏錢，唔使多講，速速磅，唔使兩頭望，佢仲話自己冇金沙咁小器。賭王講呢番話時豪氣蓋天，個樣真係講得出做得到咁款。有機會踩對手喎，當然要加多兩錢肉緊啦，呢啲寶貴機會真係萬勿錯過。
八方記得身兼澳娛股東嘅四姨太早幾日唔係咁講喎，四太話以前未試過面對呢種問題，未有先例，所以冇處理事件嘅經驗，又話會尊重澳門政府要修改賭博條例嘅決定，講嚟講去，就係冇講明如果事發喺葡京究竟會賠，抑或唔賠？今次賭王開金口話未夠秤賭客喺葡京贏錢照賠，總之願賭服輸，睇怕四姨太日後遇到呢個問題，都會按照賭王旨意速速磅水，逆咗聖上意思就唔好啦。