《哈利波特》大熱賣，作者羅琳成為全球最富有女士，亦當然係最富有作者。點解西方作者可以咁巴閉，中國人作者就冇百分之一咁幸運呢？星期日有一段新聞，大家睇吓就知道點解我哋做寫稿佬冇乜希望發達。
上星期日《新報》報道：「隸屬新華通訊社的新中國新聞有限公司，向康文署轄下的公眾圖書館提供五百三十四本盜版蔡瀾作品，而被票控，該公司代表昨日在東區法院認罪，被判合共罰款二萬五千元。」

原來呢間新中國新聞有限公司代康文署買書，買咗幾百本蔡瀾作品，未審真偽就交貨，康文署矇查查，照收貨，去年八月有記者揭發，於是康文署搵海關核查，再經蔡瀾證實係盜版之作，先至鬧上法庭。
你話盜版之人幾明目張膽，喺大陸盜印蔡瀾唔在講，新華社屬下嘅公司亦照樣買盜版貨交畀圖書館，即係話蔡瀾嘅書即使幾受讀者歡迎，蔡瀾亦得唔到好處，佢嘅利益畀人偷晒。最令人氣憤嘅係專業買書人（新中國新聞有限公司）冇專業知識分判真偽，康文署、圖書館唔識分判真偽，人哋賣盜版書，佢哋又信，咁樣，出版界利益有何保障？唔通每次都要由作者查核？
如果中國唔係盜版猖獗，蔡瀾老早應該賺到更多更多嘅版稅，享受生活。
羅琳好彩生為英國人咋。