允兒BB舊愛李昇基嘅全新綜藝節目《新西遊記》今日播出，節目中李昇基同拍檔姜虎東為去西安旅行一事有傾有講，姜虎東大晒老婆買畀佢嘅紅色新鞋，而今年28歲面臨當兵死線嘅李昇基，就親口提到入伍問題。

李昇基話：「最近我睇過相，師傅話我明年會好順利，我就答佢我明年要服兵役，佢就叫我延遲一段時間先好去。」跟住佢仲笑住話：「總之明年唔係去軍隊，就係去監獄（逃兵役嘅後果），是但揀一個啦。」暗示明年一定會入伍，唔知各位粉絲捨唔捨得呢？

至於日前宣佈將於11月入伍嘅東方神起成員Max，噚日喺首爾出席護膚品牌活動，同場仲有「韓國新抱」湯唯，湯唯露背又晒腿，仲要擺鬼馬甫士，表現風騷。