南韓女足仙氣靚女李玟娥（Mina），今季轉戰女子日職有好開始，喺今日開鑼戰代表新東家INAC神戶正選披甲，2:0贏波旗開得勝。

香港球迷心水清嘅話，應該都記得佢喺2016年年尾隨國家隊嚟香港，出戰東亞盃外圍賽，仲大炒香港14:0，Mina都有入一球，不過到上年年尾決賽周成績就麻麻，南韓女足三戰全敗包尾。Mina近年人氣唔錯，呢位進攻中場喺幾個月前離開母會仁川紅天使，轉戰日職加盟INAC神戶。女子日職喺周三開鑼，有Mina嘅INAC神戶亦旗開得勝，喺主場以2:0擊敗日體大FIELDS橫濱，Mina呢場波冇波入，仲喺66分鐘被調離場，不過都總算係喺新環境有個好開始。

除咗Mina，INAC陣中仲有一位人氣好高嘅靚女，喺今場波一樣以正選上陣嘅仲田歩夢。24歲嘅步夢妹出道以嚟一直都係效力INAC，可惜係入球率唔算高，暫時仲未有機會入選國家隊。

--------------------
永不獨行！利物浦 FC 當季球星降臨《BFB》！立即帶領紅軍，創造新輝煌！ http://bit.ly/2oQObi1