炒資源股潮流是否已經近黃昏？無人知。但礦產及能源有價則係不爭事實，逢有股份「染黑」必會吸引到股民目光，加上年內關於資源股的併購入股新聞從未停過，更使市場充滿憧憬，散戶跟炒不亦樂乎。

福山計劃買焦煤礦

好似剛有中鋁（2600）母公司中鋁集團與美鋁聯手入股全球第三大礦業公司力拓集團12%股權，刺激中鋁股價上周五急升12%。另新時代（166）涉足阿根廷油田業務，新世界（017）主席彤叔旗下私人公司萬新及周大福計劃入股25.02%，如事成，將成為新時代大股東。雖然彤叔話現時尚未正式注資新時代，但連蒙古能源（276）都敢買，日後注資新時代又有乜出奇？
另一隻剛有新聞係福山能源（639），該股計劃斥資過百億元，收購「福龍」3個位於山西省的焦煤礦。據悉該焦煤礦運作已有10年，年產原煤能力約為360萬噸。上述消息對福山而言應屬正面，可於4.90元水平小注玩玩，以4.30元止蝕。