免費報紙戰場再添一員！星島報業噚日宣佈旗下英文《虎報》由今個月10號起轉為免費報紙，逢周一至六派，每日平均發行12萬份。𠵱家《虎報》每日大約印五、六萬份。星島主席何柱國次次開記招都有精句，噚日《明報》記者問佢對份新報紙信心有幾多？何生話：「我冇信心㗎，你聽成日聽乜㗎？問啲嘢咁戇居嘅？我有水泡響度，知道唔會浸死人，咪行囉，我想學吓嘢，得唔得呀？我想維持張報紙啫，小姐，有冇錯呢？……每個投資都係賭博，賭錢點會唔用大腦……」
嗰位記者繼續問：「咁你份報紙政治立場係親政府……」何生即刻回應：「我一啲都唔覺得噃，講支持政府，我覺得你哋《明報》好出位，好親政府……我哋好中立嘅……」但最後又補充話「支持政府唔係犯法。」