【新增影片】

人類總要重複同樣的錯誤！

你俾阿寶唞下好唔好？

半年前，子華神幫大家樂賣廣告，個廣告擺上facebook短短一日，就有86萬次瀏覽，有2.9萬個like，以呢個數字，廣告算相當成功，可惜事實偏偏相反，因為近1,000個留言，幾乎一面倒鬧爆呢個品牌，話佢出品嘅豬扒紙咁薄，與其用錢賣廣告，索性做好食物質素……(新聞連結: http://bit.ly/2fqLyga )

半年後嘅今日，又有另一個品牌，同樣係快餐店，同樣拍廣告，同樣搵藝人，同樣放fb，同樣網民嘅反應都好熱烈…

呢間快餐店，個名叫翠華，根據集團網頁，原來創立咗49年，最近佢哋搵咗有份拍電影《點五步》嘅林耀聲同胡子彤拍廣告。

上次子華神喺廣告入面，就想帶出失落人情味，今次林耀聲就做新郎，娶個外國女仔，强調即使有文化差異，面對好食嘅嘢，其實口味都可以好一致！

都係嗰句，若然品牌形象好，拍廣告固然相得益彰，之但係有時嘅嘢，偏偏事與願違，直頭係貼錢請關公。

望番個廣告，接近3分鐘，以嫁娶為名，Hard Sell為實，你可以話賣廣告當然要Hard Sell，但偏偏某幾個場面，用力過度……其中兩幕好經典，包括係奶奶接過新抱杯茶，正確嚟講係奶茶，突然碌大隻眼好驚訝咁「吓」咗聲，之後奶奶同老爺就好欣慰咁，俾咗封茶餐廳禮券俾阿仔同新抱，試想想…若然你收到，應該俾咩反應？

再望吓啲留言，又係幾乎一面倒狂鬧品牌有錢有時間賣廣告，不如改善吓啲服務態度同食物質素云云，不少人更留言轟呢間咩華扮本土道地，實則只係做大陸人生意，而且價錢不合理地貴。有人留言:「上次食咖哩雞，飯凍，咖哩是熱呀，不過煮燶咗；奶茶超甜；奶油豬，皮是硬，唔脆，一邊超多奶油，一邊得少少。埋單80幾。真是多x謝！」喂，又奶茶又奶油豬又咖哩雞飯，收你80幾算平啦(#曲線要講明)

節錄部份留言：
「做咁多marketing啲嘢咪又係加價，直接有香港ID七折仲好啦，你哋貴到離譜，仲要食物質素差過未上市好多，你哋嘅經營手法非常獨特，亦不理解。」
「喂，你哋唔係好鍾意大陸客？只做遊客生意，請晒新港人，有晒政治立場撐共，又睇唔起本地人㗎咩？扮乜嘢親民？我建議你哋全線搬晒過深圳河以北，嗰度啲人消費力高啲，唔會有咁多人搞事，啱晒你哋。」
「茶記就係茶記，做好本份先搞其他嘢喇！」
「就算點拍廣告都好，都改變唔到佢哋嘅員工睇唔到聽唔到香港人叫佢哋～大陸人一句：『服務員！』佢哋就3個人飛埋去招呼佢哋認為尊貴嘅大陸客。」

睇嚟，關公又要蒲頭！

有份拍攝呢個廣告嘅胡子彤，今日回應《蘋果》時說：「剛從電影節回來，工作是公司安排，我都係做好自己工作，冇留意其他。對白是拍攝前一日收到對白，花了一晚時間去諗，拍是亦都有NG過幾次。」