【新增影片】
打到附加洞先嚟落沙坑，唔通連個天都唔想我贏？史比夫一於化腐朽為神奇，一舉拿下勝利！周日PGA旅行者錦標賽第四日賽事，23歲嘅史比夫喺最後9洞喪失優勢，以平標準桿70桿完成，同呢日打出低標3桿嘅丹尼爾貝加雙雙造出低12桿嘅268，要進入附加洞決勝。史比夫第2桿打落距離洞口61呎5吋嘅沙坑，以為佢跟住呢吓「bunker shot」救到上果嶺已經好叻仔，點知竟然直接入洞取得「小鳥」，結果以一桿氣走貝加封王，並成為1983年以後第2位喺24歲生日前贏得10項PGA錦標嘅球手，對上一位係24歲前贏得15冠嘅「老虎」活士。

不過，了解史比夫嘅人或者心有靈犀，同樣係高球手兼史比夫童年好友湯馬士（Justin Thomas），喺史比夫擊出「bunker shot」之前出咗一個tweet，表示：「如果史比夫直入呢球bunker shot，我唔會意外。」結果真係俾佢講中，引來網民瘋狂潮拜。史比夫賽後就笑言：「我諗如果你做同一樣嘢次數夠多，間唔中做一次，總有一次會做到。呢件事實在太cool，我好似感覺到成個場震動，球迷實在太熱情。」

↓史比夫bunker shot絕殺↓
http://bit.ly/2sRpy6F