鄧麗欣（Stephy）、黃宗澤（Bosco）及關智斌（Kenny）昨晚到尖沙嘴出席時裝活動。與關智斌份屬友好的黃宗澤，原先答應Kenny擔任其演唱會嘉賓，但最終甩底，Bosco笑言︰「我深感內疚，因為要去日本拍攝工作，自己做唔到嘉賓都好唔開心。原先同Kenny講，佢喺邊度需要我嘅地方都可以搵我，點知撞咗期自己唔喺香港，原先可以借佢個舞台畀我還樂壇一個交代，我問佢要唔要拍片，佢再冇覆我，可能佢嬲咗我。」

Kenny笑指Bosco應該深感內疚，Kenny說︰「佢應該內疚，我一早同佢講我有演唱會，佢竟然飛走，我心碎。請佢拍片，我唔想大材小用，想同佢合唱，要佢畀樂壇一個交代。」Bosco指Kenny沒回覆，Kenny說︰「係咩，之前同佢拍咗3、4個月戲，唔知佢邊啲係真話，對佢要冷處理，不聞、不問、不回覆。」

好友張敬軒表示，要為Kenny演唱會調理音響並提供上門服務，Kenny說︰「佢咁抵得諗，已經調咗祖兒十幾日，仲有時間幫人調音，第一次處男騷對我嚟講好緊要，真係要好好調音。」張敬軒笑言會輕輕地用陰力調，Kenny說︰「我第一次難免緊張，會封番封老毛（利是）畀佢，佢咁好心地，佢調得好就畀佢上台，佢就嚟演唱會，畀佢上台宣傳下。」

對於好兄弟張致恆（Steven）結婚，Kenny回應︰「嗰晚有短訊祝福佢，佢冇叫我哋去觀禮，佢想低調我唔介意，佢話遲啲婚禮食飯一齊搞。」至於阿Sa、阿嬌、張敬軒要與Steven割席，Kenny說︰「我唔識答，問番佢哋啦！」

此外，有傳Stephy出手幫和好的傅穎（Theresa）回流返港發展，Stephy說︰「冇呢件事，點會係我幫佢傾合作，佢自己都有公司。大家睇完Sammi騷之後，有IG關注，有私訊傾偈。」對於Theresa有否透露返香港發展，Stephy說︰「佢不嬲都兩邊走。」對於Cookies四人能否合體，Stephy說︰「件事有啲複雜，有兩個準備生嘅媽媽，但唔係冇可能，Kary（吳雨霏）就嚟生，要漫長嘅湊仔時間。」

採訪︰張明
攝影︰陳慧安

-----------------------------
【撐學生】
召集有心人 撐學生全年睇《蘋果》
立即按此