【新增影片】
智利同葡萄牙星期三喺洲際國家盃4強踢足120分鐘都係賽和0:0之後，憑住門將哥迪奧巴禾連救三球12碼，互射12碼以3:0擊敗葡萄牙而打入決賽。原來喺同一日即係美國時間星期三，互射12碼救咗三球嘅仲有美國足球聯賽（USL）球隊辛辛那提FC嘅希迪布蘭特（Mitch Hildebrandt），雖然呢位28歲美國門神唔係好似巴禾咁連續救出三球，而係救出兩球之後畀人射入一球再救一球，但能夠喺一場比賽救出三個12碼都係相當難得。

呢場比賽係美職聯賽盃嘅第5圈比賽，辛辛那提FC同美聯（MLS）芝加哥火燄踢足120分都互交白卷，要互射12碼決勝。結果今場表現出色嘅28歲美國門將希迪布蘭特救出咗MLS領先射手尼曼查尼高歷、艾圖路艾華利斯同埋祖連奴主射嘅三球12碼，辛辛那提FC亦以3:1射贏火燄而打入8強。