【體LIVE FAN享會】利迷唔敢提早慶祝 南野一月染「紅」或成秘密武器
蘋果日報 2019/12/19 19:00
利物浦屈福特球迷會FAN享會蘋果大樓Matchbox
上個禮拜六《蘋果》體育搞第二次體LIVE FAN享會，睇住利物浦喺主場晏菲路，憑沙拿梅開二度，二比零擊敗屈福特，加上個邊廂李斯特城只能以一比一逼和諾域治，紅軍已經喺榜首帶開李斯特城10分。不過禮拜六有份嚟到蘋果大樓Matchbox一齊睇波嘅利物浦球迷會幹事Mino，都唔敢咁有信心。Mino表示：「大家作為利物浦球迷，應該都一天未有獎盃到手，一天都不敢說必贏。所以我想今季目標，一定是英超(冠軍)是毋庸置疑的，去年都只是爭一些，今年的決心就更加大。」
不過除咗英超，要做歐洲班霸，就肯定要多線發展，包括以衞冕身份應戰嘅歐聯。好在上個禮拜經過埋分組賽最後一輪賽事後，利物浦暫時就告一段落，二月中先至會再重燃戰火；但仲有另一個盃，就係周中展開嘅世界冠軍球會盃。Mino補充：「接下來世冠亦是目標之一，過去05年敗給了聖保羅，(如果贏出)有個世冠章，去參加歐聯，又可以印球衣。」
不過近期利迷就有另一個利好消息，之唔係喺奧地利球隊薩爾斯堡表現非常突出嘅日本國腳南野拓實，盛傳將會喺一月加盟紅軍。「普通的日本球員整體性較多，他(南野拓實)的個人能力跟普通日本球員不同。」嘉賓黃耀富補充：「你看過往幾年利物浦，可能在一二月，因賽程頻密而踢到啞火，高普很少在季中買入球員，我相信他根據長時間研究，他才會有這樣的部署。」
難得超過170位利迷嚟fan享會睇波，又睇下佢哋能否如願，利物浦可以喺今季一破英超冠軍荒。
