初一喺大球場，巧遇潮界經紀大隻標，只見佢頸上仍然搭上BeamsBoy毛巾，腳踏關刀燈，一副地道潮人模樣。踏入雞年，聽講百業興旺，各界睇好零售巿道，大隻標則有咁嘅回應：「唉，冇錯係前景唔錯，不過只怕危機藏於美麗夢想背後，其他我唔講，講吓我最熟嘅旺角區。我有個老闆喺旺角個新大型商場開舖，開喺最貴租嗰幾層，只賣貴價嘢，平時做開朝11晚8，最多過時過節開到10點，你知喇貴價嘢，開得夜就冇乜客幫襯，點知管理公司就發律師信，強烈勸喻最好做到11點先收舖，否則個場冷清清就唔好睇。我老細話擺明收舖嗰幾個鐘係白做，嗰段時間，燈油火蠟年終計埋唔嘢少，長此落去唔多妥噃。

「另一個老細，喺亞皆老街個皆旺商場有幾個舖位，租晒俾班雙失青年賣𠵱家時下流行嘅扭蛋玩具，雖然每單交易只得幾十蚊，賺嘅只係十零蚊，但山大斬埋有柴，就算每個月租成萬銀都維到皮。𠵱家成個場都賣呢類扭蛋，管理公司總算快反應，提議不如改名為『皆旺玩具交易中心』，一於學兆萬咁形象出位，點知俾其他唔係做玩具嘅業主反對，終於計劃落空，難得個場剛剛谷起，問你後勁點樣承繼？另一個老闆喺花園街，因為西洋菜街AV舖之爭，𠵱家被加租困擾，唉！所以話今年仍有好多挑戰！」

主持人：大食Jack
八卦熱報：[email protected]