遊戲勁過電影IronMan裝甲晒冷
仲諗住08第二季必屬《Batman》天下,點知死對頭Marvel《IronMan》勁收得,Game界自然食住上!月初推出PS3/XB360雙主機版本,故事唔使講梗係忠於原著,更出奇竟然有10款不同IronMan裝甲出現喺遊戲內,每次進化都有新面貌同強勁武器,玩過就知主角TonyStark的確係超變態軍事天才!
記者:陳國輝
如果睇咗Marvel漫畫版,可能會覺得遊戲劇情同原著有些少出入。事實上,遊戲版以電影為藍本,故事講述武器製造商天才TonyStark因一次意外,被恐怖分子綁架,更威脅佢必須研製一件可摧毀全球嘅超級武器,等佢哋能夠統治全世界。喺研發期間,主角發現其拍檔原來一直有暗中勾結恐怖分子,出售武器,於是佢嘔心瀝血研製咗第一部裝甲MARKI,為脫離險境之餘,仲想破壞恐怖分子嘅驚天陰謀。
■仲記得主角首次控制MARKI,呢幕喺遊戲亦有出現。
■TonyStark可謂足不出戶,在其L.A.住所內開發裝甲。
正因為劇情大部份都跟足電影,加上呢一隻係ActionGame,激鬥場面梗係精采啦!如果大家睇咗電影,就記得TonyStark一開波穿起套MARKI裝甲,除咗淨係識慢流咁行,連飛天都唔曉;但直到開發MARKII嘅時候,測試重點已經去咗控制飛行方面,之後大部份打鬥劇情更於空中發生!查實,遊戲亦以空戰為主,玩家首要學習點樣喺空中平衡身體,然後再掌握飛行方向,情況就類似電影中嘅TonyStark咁不斷撞板!學識飛行之後,再嚟就要練習瞄準目標發射武器,其實裝甲內隱藏咗瞄準裝置,Tune得準嘅話,話唔定更輕易擊敗敵人。
電影中嘅TonyStark唔單止係個鑽石王老五,而且仲住喺山頂超級豪宅,唔使憂柴憂米,梗係可以專心一致咁研製裝甲啦!不過,遊戲主角剛好相反,佢窮到仙都唔仙,如果想Upgrade套裝甲,玩家就必須完成任務,賺錢幫自己升級!遊戲內特別提供一個裝甲升級介面,裏面有唔同機能屬性,例如生命機能Armor、攻擊系統Repulsors、能力系統PowerSystems、副武器AuxiliaryWeapons以及行動力嘅MobilityEnhancements。玩落確實係幾複雜,但如果想儲夠Level打大佬,咁都冇法啦!
■TonyStark提升裝甲防寒能力,跟電影橋段一樣。
見於漫畫《TalesofSuspense》超過200期,夠晒長青。
機種:PS3/XB360
開發商:SecretLevel
發行:SEGA
顯示:1080i
音效:杜比5.1
類型:動作
玩家:1人
售價:$328