個市唔夠生意，好多人以為最慘嘅人肯定係班卜架，皆因佢哋無底薪，加上收佣金嘅關係，啲風險重要自己孭番晒。不過，原來入機嘅交易員重慘，如果佢哋做錯嘢，所涉及嘅都同錢銀有關，喺啲咁差嘅環境下，好多人寧願自己「骨」聲吞咗去都唔敢報數畀老闆知，真係有苦自己知。
好似上個星期五，有個行家話畀伏勝知，佢公司有個交易員唔知係唔係未瞓醒，明明收到個盤要用兩毫子沽8萬股成功控股（288），點知佢喺入機嘅時候就入咗兩個仙沽8萬股，結果俾街外人眼明手快攞咗，個交易員先知做錯盤，結果迫住喺市場補飛。