韓國tvN綜藝節目《名單公開2017》噚日播出最新一集，當中就以「演藝圈嘅黃金族譜」做主題，盤點圈中藝人之間嘅親戚同友好關係。

當中近日人氣劇《鬼怪》嘅男主角孔劉就排第三位，孔劉圈中有唔少好友，好似姜棟元、趙寅成、李棟旭都係老友，不過佢同姜棟元就唔只老友咁簡單，原來兩人喺初出道做模特兒就認識，佢哋嘅爺爺一齊喺釜山長大，之後仲成為親家，據知二人喺2004年先知佢哋有咁嘅關係，所以感情自然親上加親。

至於排第一位就係韓劇《加油！金順》女星韓惠珍，佢本身就同國腳奇誠庸結婚，大家姐韓舞映同韓片《姦臣》男星金康宇結婚，而二家姐韓佳英就同明星廚師趙宰范結婚，雖然只得韓惠珍係圈中人，但佢兩個家姐嘅另一半都同演藝圈有關連，所以就順利成為冠軍。

而第二位就係韓劇《打架吧鬼神》嘅權律，佢姨媽係韓劇《明成皇后》女星崔明吉，權律唔想沾姨媽嘅光，一直隱瞞雙方關係，直到出道6年後先被公開。

排第四位至第九位就分別為男星李章宇同二人男子演唱團體Fly to the Sky成員Fany是表兄弟、孔升妍同女團TWICE成員定延係親姐妹、《鬼怪》男星陸星材同樂隊玫瑰旅館成員陸仲完係叔姪關係、MBC主播朴恩智同YTN主播朴恩實係姐妹關係、歌手兼主持人柳熙烈同諧星申寶羅係表哥表妹關係、少女時代成員Yuri同模特Vivian係表姐妹關係。

另外，孔劉出演嘅《鬼怪》今日就公開咗花絮照，當中孔劉要喺嚴寒下喺雪地上拍攝外景，由於天氣十分凍，所以導演一喊停或者要補妝時，工作人員都十分醒水，即時遞上暖包畀孔劉，又知佢塊臉就快凍僵，所以即用暖包為佢暖臉。