祖雲達斯今季降咗落意乙比賽,搞到場場波都好似大人同細路踢波,幾乎贏梗咁滯。好似前日祖記又作客擊敗泰列維素1:0,聯賽5連勝後以-1分排喺尾2(開季扣17分),多榜尾阿雷素1分(違規被扣6分),唔使再做包尾大幡。不過,祖記場場亞洲盤都要讓對手球半或以上,帶挈唔到球迷贏錢嗰度衰呢。
祖記季前雖然走咗唔少主力,但仲有中場尼維特、前鋒廸比亞路同查斯古特等咁多勁人壓陣,難怪佢哋仍然大超班,查斯古特仲暫時以5個聯賽入球成為意乙射手榜榜首㖭。
話就話𠵱家祖記仲係負分,同榜首嘅熱拿亞有16分距離,但係外國大莊依然睇好佢哋可以後來居上攞走聯賽冠軍。