現年53歲嘅金牌監製錢國偉(Wilson)經常有女埋身,但至近年終於畀細佢20年嘅「雜果賓治」陳宛蔚(Calinda)收服咗!
去年7月Wilson喺美國向女友送上3卡鑽戒跪地求婚,據本報收到消息,原來佢哋已定於今年10月8日喺尖沙咀洲際酒店結婚,同黃曉明、Angelababy以及盛品儒、蔡一鳳呢兩pair撞到正同一日擺酒,呢日應該係適宜嫁娶嘅大好日子啵!
錢國偉同好多圈中人稔熟,估計「古惑佬」鄭伊健同錢嘉樂都走唔甩會做兄弟團,而準新娘Calinda日前就去咗新加坡搞咗個婚前之旅,佢其中一位圈外好姊妹喺facebook放咗多張相,留言﹕「SendingoffourBridesToBeCalindaChan&AngelFantherightway!Ourhentripsneverdisappoint.」
見Calinda戴住小皇冠,同另一位同樣準備結婚嘅女仔朋友,身上都帶住一條寫住「Bridestobe」彩帶,一班人飲到面紅紅、醉醺醺,盡慶一番。
而本報記者致電恭喜Wilson,佢笑笑口反問﹕「邊個講㗎?係book咗,但未confirm,未入紙㗎。」問佢嗰日係咪好日,揀埋同黃曉明、Angelababy,仲有盛品儒同蔡一鳳同一日擺酒,佢話﹕「盛品儒我知,但Baby都係嗰日結婚咩?佢邊度擺?」
得知曉明同Baby喺上海擺酒之後,Wilson似放下心頭大石謂﹕「哦,咁都好啲,唔係就索性轉日子嘞。」問婚禮籌備進度如何?佢話:「我0依家搞緊劇本,0依家交晒畀大人(Calinda)去搞,開緊會遲啲講。」然後就急住收線。