以Inno90及Inno80於香港成功站穩陣腳的Innostream,話咁快又有新機到港,型號為Inno89,初睇以為係Inno90的細佬版本,睇真啲原來係Inno80嘅換面版本,只係外形由80的四四方方改為89的圓滑,更加適合女性用家。同樣具有26萬色內芒及6萬5色彩芒嘅Inno89,論功能絕對唔比Inno80弱,10萬像素鏡頭影相兼拍20秒短片,加埋超大聲64和弦鈴聲,就算開到最大聲都未有拆聲,質素唔錯。而MMS、GPRS及WAP已經係手機指定動作,當然唔會冇。開價$3,200未算最平,但係大家揀26萬色彩芒機又多一個選擇。
記者、攝影:劉耀祥