明晚（26日）第二場四班1650米，這場季內識贏的佔過半，有「珍珠鳳凰」、「君子承諾」、「鵲橋飛渡」、「鑽石達人」、「神速寶」、「乘勝追擊」及「領闖者」，當中又有過半自季初、季中勝後開始回落。

搏足一季未識贏，恨贏的「火百合」，無疑比季初好，卻談唔上有壓倒性優勢。

反而識贏，兼新勝五班的「神速寶」，今年一月中試閘流鼻血，長唞至五月中才復出，數埋今次，也只是休後第三仗，體力、狀態到此刻才上高位。

難得「神速寶」贏完，賀賢肯繼續壓逼，草地、大閘課期排住做，更因此變得更弗！季尾夠銳，是「神速寶」最強本錢，比起同場對手，無一瓣被比下去，食住個勢，返四班再跑，又有合理賠率，依然值博。

第四場四班1200米，「王者奇兵」只三歲太年青，情緒易受環境影響，一變得緊張，落場就唔放鬆，好難可以跑得好。前仗初到跑馬地，竟出奇地唔騰雞，落場表現亦比預期好，上次跑田草，行圈又故態復萌，失準唔奇怪！

輸埋上次後，姚本輝用時間，期望有好成果，用近兩個月，先俾「王者奇兵」回氣，負責教馬的夏禮賢，落足心機改善韁口、操控，最近確見有成效，比起預期變得更好。

「王者奇兵」若在沙田復出，還怕臨場會發癲，然而明晚在跑馬地復出，只要行圈夠定，便有可能見到牠，與早前有幾唔一樣！

-----------------------------
7月4日起 《蘋果動新聞》只限升級壹會員閱覽
繼續撐蘋果！