黃玉郎與杭州千島湖合作,於當地興建「玉郎巨星文化創意樂園」,今日喺金鐘簽訂協議,獲邀出席有香港商務及經濟發展局局長蘇錦樑、楊受城、林文龍、泳兒及鍾舒曼等。
黃玉郎指項目投資8億港元,佢佔一半投資額,明年動工,預計2018年中開業,樂園分為動漫、巨星及玄幻3個區,將動漫人物演變成實體,又會有機動遊樂設施,黃玉郎話:「樂園120萬英呎,半個維園咁大,預計1年約2百萬人次入場。」
林文龍除咗籌劃新戲,佢喺內地亦有投資房地產,佢話:「房產少少投資,逐步嚟,唔好咁貪心。」對繪畫甚有興趣嘅鍾舒曼嘅小時候夢想係做漫畫家,佢話:「出一本個人漫畫係一份堅毅嘅工作,我都唔敢諗。」
林文龍於前日同郭富城完成《寒戰2》拍攝,林文龍話:「今朝恭喜咗佢,我唔係好八卦,但都感受到佢嘅喜悅,今朝送完個女返學,老婆畀我睇段新聞,年齡唔係問題,佢行出嚟唔講你都唔知佢幾多歲,佢個樣都唔似50歲,心境先係問題。」對於城城少有認定女友地位,今次Moka獲公然寵幸,更可能係結婚對象,林文龍亦感意外,佢話:「佢基本上冇公開過,好戥佢開心,希望好事陸續嚟。」