蘭西噚日到熱賣中嘅東涌藍天海岸售樓處,碰到文化界名人馬家輝博士,佢自爆剛以四百五萬,買咗個千二呎單位,方便佢位十一歲囡囡,第日去迪士尼玩,認真廿四孝!
兼任電台時事節目主持及專欄作家嘅馬家輝,未知會否將新思維帶進藍天海岸,但肯定已帶出樓市正面訊息。佢話十分認同中原集團主席施永青話樓市會「一浪高於一浪」嘅睇法,又透露持有香港同深圳四、五個單位,入市從未錯過,不過蘭西發現佢今次係經美聯買樓,可能令施老闆非常失望。
元朗古董村屋高價易手
古董愈舊愈值錢,估唔到村屋都一樣。
世紀21錦大地產分行經理王惠萍表示,大棠丈量約份一一七號一幢三層高嘅二十年村屋,剛以四百七十萬賣出,呎價二二三八元,比新落成嘅村屋呎價一六六七元,足足高咗三成四,重係同區二手村屋十年新高㖭。原因係呢幢村屋附連萬三呎巨型花園,十分罕有,而一般連花園嘅最大都係一千呎。
原業主持貨十三年賺百七萬。聽講買家諗住做度假屋。
祈福南海有新猷
番禺祈福新邨賣咗十幾年,港人都好熟悉,發展商祈福集團另一南海項目「祈福南灣半島」,計劃本月十一日展示現址售樓部、示範單位及社區環境,二十五日發售。
祈福南灣半島首期共三十五座獨立別墅,三十個半獨立別墅及聯排別墅,而水岸洋房及複式約二百個。面積由七百五至三千八呎,售價二十六萬起。全部工程上個月底竣工。