當年今日
關於我們

史達寧學派路笠射12碼飛機
紅軍迷最期待畫面

蘋果日報 2018/12/20 05:20

英聯盃足球曼城史達寧李斯特城

英國球壇喺星期二最轟動嘅新聞,梗係曼聯炒摩佬喇,佢哋嘅同市宿敵曼城就有正經事要辦,同日出戰咗英聯盃八強。藍月作客李斯特城法定時間踢成1:1,結果互射12碼贏3:1晉級準決賽。賽果唔算令人意外,但12碼過程中,一向射術不精嘅史達寧竟然主動獻醜,打算學派路瀟灑笠射12碼點知炒高,隨即俾前利物浦球員、李城門將丹尼禾特當面恥笑,一眾利迷當堂非常高興,直頭要高路普簽禾特返紅軍!
曼城門將撲兩球贏李城
今仗曼城有傷癒嘅奇雲迪布尼同阿古路擔正,17歲西班牙小將艾歷加西亞更首次為一隊上陣,開賽14分鐘迪布尼就喺禁區邊表演腳法,避過李城守將後射門破網,幫曼城半場領先一粒。不過皇權球場下半場雨勢越落越大,結果李城中場馬克艾拜頓喺73分鐘偷雞得手,兩隊90分鐘踢成1:1,要互射12碼分勝負。

頭輪李城嘅哈利馬古尼同曼城嘅根度簡都射入,第二輪李城死球專家基斯甸富治斯「飛機」,曼城就派出一向自信爆棚嘅史達寧主射,點知呢位前紅軍球員竟然選擇笠射,結果將個波踢到鬼死咁高越楣而過,曾經同史達寧喺紅軍做過三年隊友嘅李城門將禾特隨即瘋狂恥笑,而呢一幕亦俾唔少利迷「Cap圖」,有人話呢一笑可以成為年度最佳圖片,有人就話禾特「一日紅軍一世紅軍」,成功向「二五仔」史達寧出氣,甚至呼籲高路普簽番禾特㖭!
夏神細佬同樣笠射飛機
雖然利迷沉醉喺史達寧出醜一幕,但李城始終都係唔爭氣,之後兩球12碼都俾曼城20歲嘅科索沃門將艾利真歷梅歷治救出,最終曼城總比數都係贏4:2晉級。值得一提嘅係,夏神細佬杜根夏薩特喺同日德甲代表幕遜加柏嗰陣,同樣笠射12碼炒粉,所以話與其獻醜不如藏拙啦!