8號仔電盈噚日派成績表,最大驚喜絕對唔係盤數,而係李主席小小超卒之肯現身,事關二少佢經已3年冇喺業績會蒲頭。平時要見佢,好話唔好聽真係好似春秋二祭咁,一年得一兩次機會。
因乜噚日咁有興致?二少話,無乜特別原因,只係聽到好多報界朋友聲音,話大家有好多問題想問佢,所以咪出嚟囉……咁又係,間公司係佢嘅,得閒冇乜做情緒又到,咪蒲吓頭囉,又可以順便提醒大家邊個先係8號仔真正話事人,所以,應該係冇乜特別嘅!Bytheway,大家真係有好多問題想問,不過全部都係啲感情問題而唔係公事喎。
至於二少答唔答得晒報界朋友啲問題?梗係冇啦!尤其係最後尾中正佢死穴嗰條:「你係咪今年結婚呀?」佢直頭閃得快過侏羅紀啲速龍……其實二少又使乜咁驚青呢?正所謂男大當婚,加埋閣下仲係全東南亞最貴嗰件王老五,賣相又唔差,咁佢一日未親口講自己已經俾人私有化,大家都係會無休止咁追問落去,不如諗定個好啲嘅答案仲好啦。