正所謂「逆水行舟，不進則退」，呢個大道理，唔係人人都做得到，但估唔到港鐵寶琳站有隻米奇（老鼠），比人類更有毅力同慧根，好努力往上爬，雖然行前十步就會褪返三、五、七步，但都冇人類可以阻止佢向上爬嘅慾望，就算嚇到唔少人走夾唔頭，都毫不退縮。

喺下行電梯往上爬

馬小姐上周五晚近10點喺寶琳站閘外通往商場嘅扶手電梯往下行，打算去搭港鐵，突然間眼角瞄到腳邊有啲嘢彈吓彈吓，望真啲就嚇一嚇，竟然係一直努力向上爬嘅米奇。眼明手快嘅馬小姐，好快就衝到落電梯底，舉機拍攝。

由馬小姐提供嘅片段見到，隻米奇一直喺電梯嘅右方，不停又彈又跳，好努力往上前進，但係礙於體形所限，堅持跟不上速度，佢難得跳上一級，電梯又馬上將佢送返落去，就咁彈吓彈吓都原地踏步，小記都好佩服佢咁堅持，但佢嘅舉動真係嚇親唔少人，乘客都行埋一邊避開，更加有女士調轉頭，向電梯嘅頂部走，同隻米奇一樣逆水行舟。

港鐵回覆指，當晚寶琳站職員接獲乘客通知，話A出口電梯發現老鼠，已即時安排清潔工處理及消毒，承辦商翌日凌晨亦已安排清潔，港鐵相信老鼠由站外進入，強調一直重視站衞生情況，已提醒職員加強留意。