中華民國雙十節，陳總統水扁發表宣言，指出「對岸」部署針對台灣中華民國嘅導彈，經已超過六百口！
陳總統又話：「對岸」用恐怖威脅，黑暗陰影嚟對付台灣中華民國，係唔會達致雙贏，最緊要係恢復九二年辜汪香港會談嘅共識，即是「一個中國，各自表述」。
陳總統向美國買六千億台幣軍備，而阿胡就派出農民外長李肇星出國到處游說，猛叫歐洲解除對北京嘅武器禁運。即是好快有一日，台灣中華民國同對岸發生戰爭，一邊用美國槍炮，另一邊就用歐洲導彈互轟，鬼佬啲軍火，究竟係歐洲嘅精良，定係美國貨正啲，大家唔使擔心，毋須等好耐，到雙方開戰，兩邊共隊冧番一億零人，到時點算屍體，睇吓邊一邊死多啲，就有答案。
今次法國總統希拉克趁住雙十，走去北京訪問，擦完阿胡一輪鞋，就打蛇隨棍上，幫口猛話歐洲應該恢復向北京出售軍火。