呂健威近兩季開齋馬「連冠勇將」和「英明神勇」，都是由莫雷拉執韁，這對騎練上季至今合作17次，成績7冠2亞2季，勝出率高達41%，儼如馬房殺手的角色。呂廄今期佈強陣，其中頭場「有智者」強配莫雷拉，呢匹處女馬求勝決心大。

第一場五班1800米，灰馬「有智者」上季跑四班同程，只輸頸位屈居亞軍，該場頭馬「常開心」之後再贏升上三班，而第四至第九名其後都有馬贏，是一場極高水準的四班賽。據聞「有智者」在比賽途中會逐漸放鬆競賽意識，末段走勢因而轉弱。近期晨課由莫雷拉操過兩課，表現變得活躍，走勢暢順，人馬合拍，今次跑首本路程，預期會有好演出。

第二場四班1650米，「權杖神駒」身型高大兼且翻步慢，始終要跑中距離才啱發揮。上季尾跑田草1600米，末段嚴重受困，亦只輸半個馬位跑第四，若果當日取位順利，頭馬早已到手。今季體重增加23磅，肌肉更加健碩，晨課及試閘表現渾身是勁，四歲馬已完全成熟，今季可望扶搖直上，在四班只屬過客。

今期冷馬：第三場「心有靈犀」長途馬六歲正值競賽黃金期，跑谷草大長途能夠衝贏「多多心得」及「飛翔星」，而目前僅48分，評分肯定仲有得上。今季先後試過兩次閘，馬身收好，出腳有力，狀態已及爭勝水準，而同場幾匹實力馬都有瑕疵，「多多心得」肥態未消，「紫電明珠」及「搖錢樹」評分盡，「心有靈犀」有權幫李易達馬房開齋。