應采兒（丁丁）同陳小春囝囝「小春子」（Jasper），間中都會喺父母微博亮相，屈指一算Jasper都就嚟9個月大啦，接近開始學行階段，對上一次Jasper同大家見面喺3月初，網上傳出一條Jasper食飯嘅眼仔碌碌精靈片段，好多春迷同粉絲都讚Jasper活潑可愛，人仔細細已經好多粉絲，好期待下次再見到Jasper。

丁丁農曆年後去咗深圳拍劇集《不孕律師》，而小春亦喺早前當上惠州巿政協，兩公婆各有各忙，加上丁丁喺內地開工，同囝囝見面時間相對減少，錯過好多珍貴場面。

丁丁今早八點喺微博上載咗張Jasper，企起身雙手用力抓緊BB床圍欄相片，對父母嚟講必定係珍貴時刻，丁丁話：「錯過了Jasper第一次站起來、第一次叫爸爸，今天我終於要被殺了。」

講到「被殺」咁嚴重？大家唔好嚇親，丁丁只係講緊佢拍緊劇集《不孕律師》殺青而感到快樂。