政府官地越賣越細幅，兼越賣越偏僻，大孖沙出手就住就住，造就唔少中小型發展商「偷雞」成功。

其中一間爆出嘅中小型發展商，就係破屯門仁政街地價新高的資本策略(497)。喺8月買入呢塊地皮之前，同區地價創出十二年新低，最平麵粉價只需每呎1,530元，但結果資本策略揮低26個對手，以4.27億元一擊即中，樓面地價5,307元，大幅高於市場預期上限近18%，創區內同類地皮的樓面呎價新高，媲美啟德市區住宅地皮，中標價同中標財團都可謂搞到全行一地眼鏡碎。

不過，主席鍾楚義講到明，佢睇中嘅，係1.26萬方呎的商業樓面，更將仁政街比喻為銅鑼灣羅素街，計劃興建14至15個舖位收租，預計單位舖位市值已經達5億元，已經足夠回本，完全唔擔心會摸頂。計埋住宅部分套現6億元，車位5,000萬元，兩年後賣樓花估計共可套現近12億元。

細心一睇，呢間公司仲即時喺9月以先舊後新配股，所得款項淨額約4.42億元，啱啱好夠找仁政街地價條數，自己掏腰包都慳返，加埋公司講明2015至16年為落成高峰期，預計每年均可提供20至30億元的銷售，資金回籠唔成問題，所以呢，4億幾買塊屯門商住地，除笨有精啦!