第28屆東京國際電影節今日喺東京六本木開幕，港片《同班同學》三位女主角郭奕芯(Ashina)、廖子妤(Fish)、麥芷誼及有份客串演出嘅日本AV女優蒼井空盛裝現身，夥拍導演陸以心及監製彭浩翔亮相紅地毯。

雖然現場氣溫稍涼，但仍無阻Ashina、Fish跟蒼井空三人以低胸晚裝谷胸突圍，以3吋多事業線夾擊一班美、日女星。而台灣天團「五月天」嘅成員石頭亦因為參演電影《百日告別》同導演林書雨現身。

電影節紅地毯今日日本時間下午3點(香港時間2點)開始，當中發生一段小插曲，被內地網民指屬於「世界的」嘅蒼井空行到一班操普通話口音嘅攝影師面前時，佢被叫離大隊要求影個人照片，同行嘅《同》片監製彭浩翔走近準備一齊合照時，亦被人以普通話叫走，佢亦笑笑口照辦。

三位女主角接受訪問時，被指性感搶鏡嘅Ashina指不知情，佢話：「事前都唔知佢着到咁性感，自己因為心情好所以着靚啲。」Fish笑言雖然好凍並且起晒雞皮，但覺得非常榮幸。而麥芷誼以坐激流嚟形容自己心情。

另外，日本演員亦傾巢而出，《律政英雄2》女主角北景子跟松山研一剛到場，在場粉絲即大叫支持，佢哋非常親民沿途為粉絲簽名，整條紅地毯行咗足足接近15分鐘。同場仲有中谷美紀、竹內結子、橋本愛等，而模特兒本田翼以傳統和服亮相，女子電音組合Perfume同美國女星希拉莉絲韻（HilarySwank）及海倫美雲（HelenMirren）亦先後到場，希拉莉表示好掛念日本美食。而AKB48成員島崎遙香以新作《劇場靈》女主角嘅身份擔任開幕禮嘉賓。