再來倫敦，睇波感覺跟前截然不同；球迷睇波如睇騷，大都會足球，阿聯酋球場盡現。
阿仙奴2:0氣走馬賽，戰果正路到暈，大家賽前期待只是一場主隊表演騷，所以從Holloway Road地鐵站走出來，最多是當地人向我們這些遊客兜售「tickets」，「踢屐」之聲直至在球場門外仍不絕於耳，警察也懶理，與我之前在中部打吡臨場買不到波飛完全兩個世界。
我等外來人，付出比票面價高逾倍去「阿聯酋」朝聖，仍高興自己是幸運兒；對當地翌日要上班的本地人，讓出手上門票給「黃牛黨」轉手賺一筆橫財，又不是生死攸關或是鬥死敵熱刺之類的打吡戰，求仁得仁。
筆者坐在高層，居高臨下，發現周遭，亞洲球迷佔多數，大家也是黃牛黨的美味「晚餐」；但認真睇波的不多，不包括我身旁的印度籍石油工程師Hemend，其他的遊來遊去，又遲到又要半場食個熱狗、又怕散場人多見大局已定早走可不少。所以我與這位死忠兵工廠躉Hemend邊睇邊傾波經特別投契，特別投入，那管比賽其實一面倒，早已出局的馬賽大部份時間hea住踢，阿仙奴用7成功力，間中施展快速地面進攻，互相短傳入滲夠殺夠娛賓。
在蘇格蘭愛丁堡工作，今次南下倫敦受訓，得以睇到周中阿仙奴波的Hemend說：「用過百鎊買黃牛飛也沒有辦法，工作關係只能周中捧場；其實我一定不會揀周末來倫敦睇波，因為當地人放假，放出門票會大減，炒價會更高。」

Hemend稱若在愛丁堡時，會約一大班人安坐家中，欣賞當地收費電視Sky的英超直播。好多廠人都憧憬阿仙奴今屆染指錦標，Hemend也不例外，他說：「今屆歐聯及聯賽都有機會爭霸，但1月要買前鋒，國內最大對手是車路及曼城，利物浦會取代曼聯成為前4。」睇電視直播，氣氛當然難與現場比擬；但周二晚，筆者感受不到主場球迷的熱情，在拚輸來倫敦，只有千多二千球迷來撐馬賽的法國人，聲音嘈吵得多。
首都球迷，來自五湖四海，在官方商店內碰上在諾定咸攻讀計算機科學（computer science）的博士生李諾及姚遠，兩位來自內地的球迷會會員說：「就算會員也不容易預訂到球票，周中波比較容易些，也要40鎊一票。」他們與Hemend心水一樣，認為今屆阿仙奴有機會爭標，最強對手也是兩支藍軍，也最愛今屆冒起的藍斯仔，亦怕基奧特會受傷，阿仙奴便鬧前鋒荒；信任雲格，願意等待冠軍。
歐聯分組賽跟聯賽完全兩種口味，既然預咗被黃牛劏，下次我寧願揀睇腳腳七注的聯賽；阿仙奴的地面進攻不及曼城具侵略性，大把在手下更見漫不經心，球迷難免不投入，千多元睇幾十分鐘騷，值嗎？
文：蘋果波神
mailto:[email protected]

足本收睇《亂噏24》x張家輝；宅男女神謝安琪隆重登場！
周一至周五《亂噏24》約定你： http://bit.ly/appletalk24