今年香港國際馬匹拍賣會分兩輪舉行，首Round於3月16日周五晚舉行。

每年呢個時候總有不少拍賣馬贏馬造勢，早前有「旅遊皇者」報捷，上周三（7日）又有「開心日子」，後晚（14日）谷戰亦有不少具份量的拍賣馬出場。

當中，第二場四班1650米的「飛馬再威」上場加眼罩跑同程，末段逢馬過馬追入第二，今次排2檔早段不用留到包尾，可憑後勁追過對手，為賀賢除黑氣贏出季內第八場頭馬。

六歲的「飛馬再威」在港服役已三季，上季5月在谷草1650米贏馬開齋，加分後亦曾在同程跑獲亞軍，反映本身角逐四班一哩表現甚準，只是體重1,000磅左右細粒仔負重磅比較吃力，而今季跑過六仗，表現較好所獲的一亞兩殿均配減七磅見習生潘明輝。

上場回師贏馬路程谷草一哩，在小潘胯下排8檔起步，前中段縮得較後，入直路拉出外叠打衝鋒，結果交出最快末段22秒98大幅追前，只不敵沿途貼欄跟前之「一支梅」，今次原莊配搭再戰，決心收復前失。

正如上文提過「飛馬再威」細細隻，惟拼敗後只隔一個月便被安排試大閘，操練工序似足上次賽前，主理人放膽做工夫，證明對馬兒體力有信心。

馬季已過了三分二，賀賢目前只得七場頭馬，距贏16場畢業仍有段距離，所以必須急起直追爭取成績，「飛馬再威」會一如廐侶「幸運時代」般搏開盡搏，力求為馬房爭取寶貴勝利。