《宮心計2深宮計》首集高開，成為2018年暫時首集收視最高嘅劇集。落筆之時，已經播到第三星期，反應變得好壞參半，我就覺得愈來愈拖泥帶水，希望韓馬利同埋周秀娜之後出場可以救返套劇。

喺兩線劇都唔係幾啱睇嘅時候，處境劇《愛.回家之開心速遞》又發威，今次唔係觀眾等緊睇嘅大小姐同送水輝，亦都唔係仲未返返嚟套劇嘅KC，而係香港島大學嘅一班同學仔。

第334集嘅故事，用男大學生因為打機而唔理女朋友做切入點，啲角色變咗古裝，喺遊戲嘅武俠世界當中決一生死。最初睇預告以為係搞笑玩玩吓，點知原來係有武打場口，又要吊威也，後期又有特效，加上周嘉洛同埋林凱恩等人嘅演出，真係冇得頂，睇到唔少觀眾包括我覺得好過癮。對比起劇情估到七七八八嘅《深宮計》同埋《飛虎之潛行極戰》，係有驚喜。

同樣嘅劇情同埋製作，如果放喺2030或者2130劇線，應該會畀人話太過兒嬉，係因為處境劇大家睇得輕鬆啲，所以先有咁嘅效果，天馬行空得嚟大家可以接受。加上依家兩線都係合拍片，只係講大堆頭同穩打穩紥，悶到死，《開心速遞》嘅無厘頭搞笑出嚟嘅效果就更加明顯。

不過呢招唔可以成日用，因為觀眾睇得過癮係對角色有了解，知道成班男學生傻傻哋，又知道Bonnie嘅性格係會無所不用其極，成件事先合理。呢啲角色性格係喺之前穩健嘅劇情慢慢培養出嚟， 如果集集都係瘋狂幻想情節，少咗新舊角色嘅生活描寫，天馬行空嘅劇中劇有一日始終會失效，淪為無聊之物。

心水清嘅觀眾同埋劇組都應該睇到，依家所有劇情都只係靠一班舊角色去支持，而且橋段愈來愈重複。新加入嘅角色暫時又未擔到大旗做條新嘅故事線出嚟，所以先會有大小姐送水輝「初戀無限loop」，同埋今次「花都神域大決戰」呢啲超現實情節，用盡埋之前角色塑造僅有嘅力量。希望《開心速遞》劇組可以繼續天馬行空之餘，仲要快啲積極培養新故事發展，先係長久之策。

專欄作者簡介：
方以文
電視迷，未成精。睇好電視。

Facebook專頁：
https://www.facebook.com/fongeman

發掘更多身邊的小城故事，請LIKE 蘋地 Facebook Page，並設定為「搶先看」： https://fb.com/appledailyland