森美今日喺中環出席「2018全城有機日」開幕禮，身為星級有機大使嘅佢，平時都會盡量食有機食物，佢話：「我哋有好多商台同事一齊向本地農夫訂有機菜，其實有機農夫好難搵錢，所以好值得支持，有機菜健康啲，少啲農藥，對小朋友好啲，我0依家都想訂有機魚，生果都盡量食有機。」

講到佢將14歲大嘅大仔送去英國讀寄宿學校，森美話：「佢啱啱返咗嚟，留一個月，佢嘅英國生活係夜晚8點幾瞓，朝早5點身，所以返到嚟香港有時差，夜晚當佢未瞓，我會同佢打機傾偈，親子一下，雖然有電話同WhatsApp，但佢成日都唔覆我，不過男仔係咁，我以前寄宿都冇理阿爸阿媽，好正常。」

將來會唔會比細女去外國讀書？森美提起個女即冧笑，大嘆表示唔捨得個女離開自己，佢話：「見到阿哥去外國，佢又鍾意，佢報咗暑假去英國讀Summer course，係佢間學校搞，有老師同學一齊去，我都放心，但我唔放心係驚佢鍾意咗，唔捨得就梗有，之前農曆新年去滑雪，原本有教練教，但後來我都教咗一陣間，跟住佢同我講『嗲地，我過唔到。』佢向我求救呀，我好鍾意，我決定下次自己教。」

精選娛聞，喺晒《娛果》
http://fb.com/appledailyent