連日來不少新聞，似乎都是與女士做主角，包括俾向生向太永不錄用嘅栢芝、離家出走嘅梁齊昕，仲有被女兒卓林報警控虐兒嘅吳綺莉。

事件發生於上周三，距今已一周。由於卓林控母虐兒，故即使出院後仍有家歸不得，吳綺莉之前接受有線訪問，就表示已安排女兒住喺一個令佢感覺安全嘅地方，至於卓林是否已出院，仍是個謎。

今午12點左右，素顏嘅吳綺莉自己揸車返有線，去到樓下嗰陣，叫兩高層落嚟接佢，然後連人帶車入停車場。到一點幾左右，吳綺莉坐其中一位高層嘅車，一行四人去到汀九帝景酒店飲茶。吳綺莉見記者影相，亦未有抗拒，更向鏡頭揮手，不過見佢哋傾偈時，吳綺莉神情凝重，難掩憂色。

下午兩點三左右，高層埋單，眾人齊齊走。問吳綺莉見咗個女未？佢話未；至於女兒是否仍留院？吳綺莉話:「應該喺…」再問佢點解住咁耐？吳綺莉聞言即有點語塞，「er……唔清楚。」及後去有線拿車，再返灣仔電台準備開工。