港視（1137）公佈，確認將不會繼續本地免費電視節目服務牌照嘅申請，意即王維基宣佈唔玩免費電視喇！

曾拍攝港視劇集《導火新聞線》而為人熟識嘅周家怡，今日回應《蘋果》時表示：「佢係一個幾好老闆，又有心搞，當初佢搞電視時真係好出心出力去做，點可以改善台前幕後佢都想做到最好，你見佢開始起步做改革，都叫開始做到呢件事。但突然咁樣....現仲放棄覺得好可惜，真冇乜幾多個老闆好似佢咁出心出力。」

身為王維基愛將「翻版楊恭如」嘅鮑康兒，對於舊老闆放棄免費電視節目服務牌照一事，佢回應《蘋果》時話：「噢...雖然有啲可惜，因為畢竟當日台前幕後都好努力去團結做好一件事，就係每日去拍好每套劇集。但最後唔發牌，我哋都曾經團結過，政總爭取過，期望我哋嘅劇集可以快啲出街，大家繼續拍番劇...但差唔多2年過去，台前幕後大家都散晒，有啲返咗大陸發展，有啲拍電影，甚至有啲轉行...其實都冇抱任何希望了。」

鮑康兒有啲感慨咁話：「只係仍然會有一絲可惜同感嘆，始終當日由訓練班出嚟，由作為新人開始拍劇，嗰2年幾，係我人生中一個美好時光，有好多同大家合作嘅開心時刻同難忘經歷。
所以都係可惜啦！不過大家今時今日都明白，王生(王維基)唔放棄，其實都有咩辦法㗎啦！」

精選娛聞，喺晒《娛果》
http://fb.com/appledailyent