今日三八婦女節，又係女人萬歲嘅日子，香港女性地位一向唔低，奶媽𠵱家仲爭緊做特首，但喺商界，上市公司始終唔多女董事。有趣嘅係，3位銀行界阿姐──恒生（011）一姐李慧敏、創銀（1111）副主席梁高美懿，同埋匯豐香港前一姐馮婉眉，都係上市公司羅致做獨立董事嘅對象，佢哋分別做緊3至4間上市公司獨董，而政界代表就係近日大人氣嘅全國人大常委范徐麗泰。

銀行阿姐分身有術

3位銀行阿姐當中，做最多董事職位嘅係梁高美懿，除本身做緊創銀董事，佢另外幫新地（016）、利豐（494）、港交所（388）、一太（142）做獨董，分身有術。
講到分身有術，范太都勁，佢舊年開始做東亞（023）獨董，加埋中海外（688）、神華（1088）等4隻中資股，佢總共做緊5間上市公司獨董。又做獨董，又要關注本港政事，少啲精力時間都唔掂！
查實近年各地提倡上市公司引入更多女董事，支持性別多元化，非牟利機構「社商賢匯」最新報告都話，舊年本港藍籌嘅女董事比例按年微升1.3個百分點至12.4%，可惜仍落後於其他地區，超過七成企業嘅女董事比例冇改善，甚至不增反減。
社商賢匯行政總裁魏余雪奕認為，好多企業仍然搣唔甩舊思想，例如董事會依然由男性主導，又或者傾向委任熟人、有經驗人士做新董事。不過「新人事新作風」，佢話未來5至10年市場將由年輕人主導，相信有助改變企業管理文化，提供更多機會畀女性發圍。

李華華
mailto:[email protected]