馬浚偉自監自編自導自演自唱嘅舞台劇《偶然‧徐志摩》，將於明年6月假演藝學院再度公演，今次邀得胡定欣飾演陸小曼一角，更有姜大衛、馮素波、黃澤鋒、李龍基、林敬剛等參與演出。對上一次演陸小曼一角嘅係萬綺雯。

今日，佢哋喺銅鑼灣出席記者會，馬仔透露暫時開10場，其中有個慈善家已認購一場，收益撥捐香港防癌會。講到定欣首次演舞台劇，佢話：「今日第一日開拍《包青天再起風雲》，拍到5月，我得一個月時間排戲，所以我有啲緊張同擔心，我希望之後去橫店，如果有空檔就返香港排住先，等自己定啲，始終第一次，好多嘢未適應。」

定欣笑指眼見好多同事踏上台板，一直好羨慕。係咪收友情價？佢表示唔收錢都肯做，但馬仔話：「我哋畀一個喺舞台劇界畀得到最高嘅價錢。」馬仔仲大讚定欣工作認真、投入、唔計較、做足功課，佢話：「知道定欣學中國舞，所以佢會有一段跳舞solo。」定欣即話：「嘩，點算？我仲要拍劇，我諗到時要喺你個排練室瞓覺。」馬仔笑住話：「冇問題，我買定梳化床，排練室可以沖涼。」

更多娛聞，喺晒《娛果》
http://fb.com/appledailyent