由宋慧喬、宋仲基、陳久和金智媛主演嘅KBS人氣劇《太陽的後裔》雖然已於14日大結局，不過電視台亦趁機推出DVD、寫真集等周邊畀劇迷望梅止渴，但最近就出現退貨潮，究竟咩事咁激動？

早前KBS推出《太陽》寫真集，開售時曾一度登上書店網站嘅熱銷榜，不過近日就出現退貨潮，有成100本書退回書店，而退貨嘅粉絲更於網上公開收據，表示不滿。據知粉絲要求退貨一來係因為本書印得差，品質有問題，例如當中有所謂的嘅高清靚相居然有唔少白點，而附送嘅寫真卡仲離譜到有膠水痕迹，加上因為製作商未有聽取粉絲要求，始終都係唔肯推出《太陽》導演版嘅DVD，當時製作商解釋：「公司多次討論後，決定唔製作導演版嘅DVD，不過會推出小說同準備電影版。」

不過劇迷對小說同電影版興趣未叫好大，反而只係想睇導演版DVD，於是批評製作商「好自私」、「只係想用盡方法呃錢」、「唔理粉絲感受」、「作為人氣劇竟然冇導演版，太唔似樣」、「邊個會去睇電影版呀？」等，並且發起退貨行動以示不滿。