【26年後再拍】那夜我替女兒R背脊…鄭丹瑞孖大女細女拍《露背脊》
鄭珉鄭丹瑞鄭瑤
鄭丹瑞近日同大女鄭瑤(左)及細女鄭珉(右)拍MV,而大女細個(小圖)曾上台獻花畀爸爸。
鄭丹瑞(阿旦)26年前曾經推出過一首rap歌叫《那夜我替女兒R背脊》,93年阿旦憑呢首歌攞到無綫兒歌金曲,喺頒獎典禮當晚,阿旦大女鄭瑤仲有上台獻花㖭。
事隔26年,阿旦再「R」背脊,拍攝咗一個「『R』背脊」2018版《那夜我的女兒露背脊》嘅廣告MV,最特別之處,係搵埋佢大女鄭瑤(Zaneta)及細女鄭珉(Amanda)亮相,三父女首次一齊拍MV。現年約30歲、擔任時裝雜誌編輯嘅鄭瑤,同任職瑜珈教練嘅鄭珉話爸爸今次做「配角」,又講笑話爸爸所得嘅報酬,就係兩個女幫佢「R」背脊。
今次MV係將女兒係爸爸前世情人嘅概念融入其中,大女鄭瑤話: 「我細細個就同爸爸拍過MV,我好希望有一個屬於我同妹妹再加埋爸爸嘅MV,或者再26年後,加埋下一代就三代同堂再拍啦!」阿旦話平時要見兩個囡囡都要夾時間,所以今次MV係一個浪漫嘅回憶!佢又話26年前首《R背脊》,係講大女嘅一個成長歷程,而今次拍《那夜我的女兒露背脊》,自己先知兩個囡囡原來都有喜劇天份,所以會考慮嚟緊炮製三父女一齊做節目等佢哋好好發揮㖭。
精選娛聞,喺晒《娛果》
http://fb.com/appledailyent
阿旦93年憑《那夜我替女兒R背脊》攞兒歌金曲,大女鄭瑤上台獻花。(網上圖片)