向有脾氣嘅阿瑟王李國章，噚日喺立法會硬銷偽學券制，唔知佢係咪俾啲姨媽姑姐煩得多，心火特別盛，接連向問佢問題嘅議員同幼稚園業界，機關槍式咁口頭發火，基本上有發過言嘅議員都有俾佢寸同鬧；就連記者都唔放過，俾佢玩咗一鑊。
首位遭殃嘅議員，係曾經做過教師嘅梁耀忠，佢話幼稚園學券制其實可以好似以前中學買位咁，按額畀錢，點知阿瑟王聽完之後，好唔客氣咁鬧佢識少少扮代表，「佢（梁耀忠）可能識少少唔識得晒啦！買位係當年轉九年免費教育，先至買位，𠵱家係咪要佢哋（幼稚園）賺三年錢呀？梁議員係咪想我哋唔方便啲家長，即刻收番呢個議案呢？」
鬧完梁耀忠，到張文光發言，張文光事先講明好多人想睇佢同李國章鬧交，所以佢噚日就唔鬧李國章，但以朋友身份忠告佢，唔好將好事變壞事，又話佢如果學券制處理得唔好，就會變成壞事。接住就到劉慧卿問問題，問局長驚唔驚學券制會導致幼稚園殺校潮等，此時阿瑟王一發言，只係想答張文光嘅問題，又同委員會主席曾鈺成講，佢驚冇機會發言答張文光，結果喺再三追問之下，佢先回應卿姐言論，不過，第一句就係：「佢問咩問題呀？」原來佢當卿姐講嘢係耳邊風。

之後輪到李卓人發言，阿人話阿瑟王請幼稚園飲鴛鴦，搞出一個非龍非馬嘅學券制，又話佢唔應該迫幼稚園由牟利變成非牟利，應該由市場主導。已經火冒三丈嘅阿瑟王喺呢個時候，即刻發晦氣話，「如果張文光議員唔高興，我好高興同佢商討，傾到佢高興為止；如果劉慧卿議員唔高興，我都可以同佢傾到高興為止；如果李卓人唔高興，我都可以同佢傾到高興為止。行政立法向來都合作，不過，你哋樣樣批評，你有責任同家長交代，點解唔接受！」
阿瑟王咁好火，一眾記者本來想等吓問多佢兩句，教統局人員原本叫記者喺立法會度等，但阿瑟王突然使出調虎離山計避開記者，迅速從後門走咗到樓下，飛快上車。其實，阿瑟王點解要怕記者，咁樣只會令人覺得佢係落荒而逃，好唔光彩。