【相識34年有料爆】黎海珊甘做「魚餌」助媾女 黃秋生專釣演藝美人魚
黃秋生美人魚演藝學院魚餌黎海珊
黃秋生和黎海珊,一個cool爆,一個是儍大姐,但兩人卻是非常非常好的朋友,願為彼此兩脇插刀。
他們85年一齊入讀演藝學院的戲劇學院,成為演藝第一屆畢業生,由同學變老友,始於不打不相識。當日入學,秋生出席介紹會,席間不少同學都講流利英語,秋生自問英語不好:「海珊英文鬼咁叻,我唔知佢哋講乜,自卑嘅人特別cool,我咪蹺埋對手,企我前面嘅佢突然無端端轉頭大聲叫我畀意見,我覺得呢條𡃁妹幾巴渣,笑聲大到震穿屋罅,心諗呢個女仔真係唔可以同佢拍拖。」開學後,他們竟成為無所不談的好朋友。
訪問這天,秋生和海珊見面又雞啄唔斷,他們在演藝的canteen吃着下午茶,話題聊回校園趣事,秋生說:「我哋平時話題會講吓愛情。」海珊衝口而出:「佢有好多愛情問題。」她隨即大爆秋生當年在演藝的愛情故事,秋生欲制止:「我話你知,海珊,你唔好亂咁噏嘢。」海珊越叫越要爆秋生有個「釣魚會」,常徘徊三樓的舞蹈室外,秋生:「嗰度最多美人魚,不過去到得個釣字,都冇魚上釣,楊英偉老婆就係dance school,海珊係我哋『魚餌』,成日跟住我哋。」海珊自爆是秋生的「天文台」,負責通風報信,秋生再說:「我成日問佢有冇新嘢?有冇身材好嘅(女同學)。」海珊緬懷跟着秋生去追女仔好玩,「課餘我哋又會嚟canteen食嘢,我成日黐佢哋啲嘢食,有次秋生嬲嬲地話要叫過另一份畀我食。黐人哋碟嘢食,食少少冇咁肥。」
兩人相識34年,海珊分享了對秋生印象:「聽住唔好話我收咗錢,我係冇,秋生當年喺學校已好多人睇到佢好有才華,好有能力,大師兄多人仰慕,但冇意義,佢只係鍾意去三樓釣魚,我唔係佢目標。」秋生被讚後也回敬海珊:「你都好可愛、好得意,係好值得愛嘅人。有啲嘢我為唔到佢出頭,咪借個膊頭畀佢喊吓。」海珊否認:「我幾時有?」秋生說:「我真係有借過,記得有次同佢坐車,我為咗避一個人坐隔籬,我就叫海珊過嚟坐我側邊,咁傾慕者見到唔會妒忌。」
當年他們到北京學術交流,秋生和海珊趁空去了遊長城,海珊即會意他要爆「鹹濕笑話」,男生就發問為何長城之間有一個個窿,秋生說:「佢大聲答用嚟『塞炮』,大家笑到碌晒喺度。」海珊辯解:「你睇男仔幾壞,咁打仗,又有個窿,我咪咁答。」秋生表示她大可用「擺大炮」字眼代替「塞炮」,不過海珊快而準的答案卻被秋生等一班男同學取笑,他就是憐惜海珊單純個性。他們又想到一次騎馬的趣事,「秋生同楊英偉當年要拍古裝,佢哋兩個男仔去學騎馬,但兩個人去騎成本貴,為經濟啲,我咁大個女未騎過馬,騎上馬好高,佢哋仲叫導師叫隻馬行快啲,我夾到實,手又拉實繮繩,太緊張,結果返去痛咗三日。」醒目秋生即反駁:「其實你有冇畀錢,如果你冇畀錢,咁咪益咗你。」兩人的友情就是在歡笑聲下積聚而來,他們在canteen坐下,往事就不斷浮現,秋生自爆是逃學威龍,面對教授使出夠鐘上堂便把課室門上鎖的「辣招」,他說:「咁我咪唔返囉。」
撰文:比華利
攝影:陳俊強
攝錄:林德雄、葉君海
場地:演藝學院
-----------------------------
《2019高級珠寶鑑賞誌》
點擊即睇過百款鑽飾名表 -----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇