香港嘅第一家庭，點解又名「愛生事家庭」？一單行李門風波，證明呢個名無改錯，勢估唔到鍾意發律師信呢單嘢，都有遺傳？漏咗行李啫，而且人哋都幫你攞返啦，梁頌昕竟然都向機管局發律師信，雖則係話表示願意提供資料啫，但都似咪太煞有介事？難怪唔少政界聽到都啞大個口！

查實機管局國泰保安三方日前出嘅報告，本身都想息事寧人，各自有下台階咪算，點估到梁特即刻彈出嚟，堅稱老婆有話想闖禁區，搞到事件又被炒熱？有政界中人話呀，機場嘅工作人員明明幫咗手，事後竟然都仲被梁太鬧，有機會點會唔報仇？

有內地中間人講起呢件事，都耍手擰頭，覺得CY認咗係特事特辦咪算囉，始終特首真係有超然，有少少特權有乜咁出奇，耍個冧話以後做好啲咪得，仲乜不停將啲火頭點起？

嗱，既然為中央帶嚟咁多麻煩，不如，2017年換咗佢啦？點知有人話未必如香港人所願喎，反問八方，仲有乜人好揀先？又話港人越鬧、CY個位越穩喎，而呢個論調，普遍政界都認同而且深表遺憾囉。政圈仲熱傳，下屆特首若多過一個候選人，好危險，所以若泛民唔推薦人出嚟選，極有可能得CY單丁跑馬仔。嘩，大倒退都得？其實喺習大大治下，有乜唔得？