華瀚生物製藥（587）4月先創歷史高位，但半年插62%，兼逢位穿位，質穿供股價同主要股東增持成本價，總市值已貼近手頭66億現金，殘到爆，有得諗。
華瀚4月宣佈2供1，每股供股價1.3元，現價（0.95元）比供股價潛水27%。喺供股後，主要股東Bull's-Eye以真金白銀1.8億元連番增持，總計1.63億股。當中，最高一板嘅每股成本價，講緊1.44元，華瀚現價潛水34%。

估值平行家一截

又華瀚經呢轉大插插，市值得70億元，幾乎睇齊手頭現金66億元。就算減埋借款，華瀚淨現金仍高達59.6億元，超級現金牛。
華瀚呢期開拓醫院瓣數，透過TIOT（受託、投資、運營、移交）模式，最新經營貴州8家醫院，總床數5,151張。集團亦計劃興建另外三家醫院，新增床位2,560張。咁睇，今年上半年，貴州GDP增長10.7%，係繼重慶之後，祖國第二高增長省市，華瀚已經食正地區優勢。
又據估計，祖國私立醫院病人住院人次，會由2012年時1,400萬，大增兩倍到2017年時4,430萬；門診人次，亦會由2012年2.5億，增加1.68倍到2017年6.7億。華瀚新業務，啱路數，應該可以喺今年全面反映，支持靚仔成績單。
華瀚家陣0.82倍PB，場內有醫院瓣數嘅鳳凰醫療（1515），講緊5.3倍PB，華夏醫療（8143）更高達6.4倍，華瀚PB平咗大大截！
兜轉華瀚，當上番供股價1.3元，要升37%，到時都得1.1倍PB，未有耐追到行家，亦未到本身歷史平均1.4倍水位。

錢雋
細價股專家
本欄逢周一、三、五刊出