係人都知藝人羅仲謙好想買樓，佢以4萬蚊租住大埔比華利山近2,000呎別墅，今年中佢入票抽籤認購長實（1113）荃灣新盤海之戀時，就自爆係冇樓在手嘅首置客，想買番個海之戀兩房單位。可惜，家陣啲新盤，人人均等，繼抽唔到將軍澳緻藍天後，佢亦抽唔到海之戀。

300萬買3個單位

但佢堅信磚頭穩陣，買唔到新盤，轉投工廈市場，最近花約300萬元買入3個工廈迷你戶，兩個位於觀塘K One East、一個位於柴灣K One Island，建築面積分別約109、117及160方呎，實用六成計約60至100方呎。
查實呢類迷你戶，係投資者買入一個幾千呎工廈單位，之後跟足法例入則拆售，例如K One East原本係該廈1樓一個6,000方呎單位，拆開46伙賣。
聽聞羅仲謙買入呢3個的骰工廈單位，其中兩個撥作儲物室，存放好有價值嘅戲服，同埋自己心儀嘅玩具收藏品，話好過去租迷你倉，擔心呢頭租完個倉，轉頭又被有關當局發現違規而被取締。至於柴灣個單位，市值月租約5,000元，買入價120萬計，回報率有成5厘，所以打算放租。羅仲謙亦未放棄買住宅，啱心水就會買㗎喇。

李華華
mailto:[email protected]